clothesFREE

gofree

Founder of clothesFREE

From: Hong Kong

Registered: 2006-07-18

Posts: 1,179

光豬旅遊全程全裸全天候

天體活動一直都得到唔少裸體愛好者嘅支持，各種天體營、天體海灘活動在較開放的地方時有舉行。早前，小記就喺網上發現咗一個有搞裸體旅遊嘅美國旅行社，唔單止招來全球裸體同好一齊同大自然做朋友，仲 Plan 好成個度假行程，等一眾裸體愛好者可以無束縛咁嚟個全程三百六十度大解放，都可算係天體活動嘅極致囉！

以往介紹開嘅天體活動，都離不開天體營、天體浴等碎料，好少聽見話有天體旅行團咁明目張膽。不過呢個裸體旅行團就認真夠薑，唔單止成班人全程齊齊剝光豬，仲會穿州過省，周遊列國，玩得好激！

天體假期

呢個裸體旅行團叫做「Fly Nude」，係由一間美國旅行社所舉辦嘅，佢哋其中一位負責人 Donna Daniels 喺介紹呢個旅行團嘅時候就話：「一直以嚟，我哋公司都有開辦天體營活動，但對於一班天體愛好者嚟講，當然想將活動範圍及規模擴大，更全面咁親近大自然、全面享受裸體嘅樂趣啦！為咗滿足佢哋嘅要求，於是我哋就成立咗呢個裸體旅行團。從上機嗰一刻開始，到回程落機前嘅一刻為止，所有團友全程都全裸上陣，全天候同大自然接觸，好 Free！」

裸足全程

可以裸住咁搭飛機去度假，仲可以全程裸住咁玩，聽落真係好吸引喎，唔知個行程安排又係點嘅呢？Donna 就話：「呢個七日六夜嘅旅行團，係由美國邁阿密飛到墨西哥嘅坎昆Cancun。為咗減少尷尬情況，今次只安排夫婦參加。旅行團主要分為兩部分，首先就係裸體飛行 Naked Air。為咗可以避免觸犯美國法律，我哋特別為團友包咗成個商務客位專區，令團友可以不受干擾咁喺機上盡情解放，而第二部分就係成個旅行團嘅核心，裸體度假周 Nude Week。我哋會安排團友入住墨西哥一間著名嘅度假酒店，嗰度除咗酒吧、康樂設施等一應俱全之外，仲有一個私人泳灘，唔驚有人騷擾，等各位天體同好可以無拘無束咁同陽光 Say Hello！」

無拘無束

聽落確實幾吸引，但事實又係咪真係咁爽先？其中一位團友阿 Bob 話：「我同太太都係天體愛好者，當我睇到呢個裸體旅行團嘅廣告時，真係好興奮，於是立即報名同太太參加。每對有份參加嘅夫婦都好熱情，令我哋玩得好投入，好開心。此外，呢個旅行團最令我難忘嘅地方，就係我哋可以全程都唔使著衫，喺呢七日六夜裡面，所有人喺任何時候都係『乳豬全睇』，無遮無掩咁食飯、飲酒、游水、篤波，完全回歸大自然，絕對係天體愛好者嘅 Dream Trip！如果你同我都一樣咁鍾意天體活動嘅話，就一定唔可以錯過！」裸體旅行團每次嘅目的地都唔一樣，大家有興趣嘅，不妨 Click 入佢哋嘅網頁留意下次活動詳情，但可惜裸體飛行只此一次，暫時都未有打算再搞，大家只可以睇相嚟望梅止渴喇！

2007.01.28 太陽報